(1845-1895) Charada 5
Dos mozos d' esti conceyu
de mal geniu y muncha juerza,
punxeronse á danzar xuntos
un domingo en prima.tercia.
Estes sílabes dan nombre
de puebliquin d' una aldea
que mialma, mialma mas chuscu
cudio yo q' utro non hévia.
Sobre si tu me triaste
ó yo te trie una deda;
sobre si yes un borricu
y non tienes mas que llengua
entamóse una foguiza,
hubo tal agarradiella,
q' afumaben les molleres
cual mi tercia con primera.
Pocu á pocu e' na disputa
entrando foi mas reciella,
y falaron los garrotes
cuando se cansó la llengua,
hubo mozu que alloriáu
magar s' entamó la griesca,
non conoció que i faltaba
d' un taragañu una oreya.
Dempués que´l barrullu calma,
cuando la xente´n paz queda,
hay que compar melecines
si el méricu les receta
Sin cuntar q' el escribanu
rexistra segunda y tercia
y cobra les ñarigaes
cuando menos á peseta.
Pos á pesar del castigu
y meter la xente presa,
en mi todu cuando hay files
non amanez sin quimera.
T. Cuesta